పశ్చిమ గోదావరి జిల్లా భీమవరం పంచారామ క్షేత్రంలో జరిగిన తాజా ఘటన భక్తులను కలవరపరిచింది. క్షేత్ర పుష్కరిణి వద్ద ఉన్న పురాతన నంది విగ్రహాన్ని గుర్తు తెలియని వ్యక్తులు ధ్వంసం చేశారు. నందీశ్వరుడి విగ్రహం తల భాగాన్ని వేరు చేయడంతో పాటు విగ్రహాన్ని పూర్తిగా తొలగించేందుకు ప్రయత్నించినట్టుగా ఆనవాళ్లు కనిపిస్తున్నాయి. ఆలస్యంగా ఈ విషయం గుర్తించిన స్థానికులు తీవ్ర ఆగ్రహం వ్యక్తం చేస్తున్నారు. సమాచారం అందుకున్న పోలీసులు ఘటన స్థలానికి చేరుకుని విచారణ ప్రారంభించారు.
ఈ సంఘటన ఒక్కటే కాదు… గత రెండేళ్లలో రాష్ట్రంలోని పలు దేవాలయాల్లో జరిగిన ఘటనలు భక్తుల్లో ఆందోళనను పెంచుతున్నాయి.
తిరుమలలో తొక్కిసలాట..భక్తుల మృతి
గతంలో తిరుమలలో జరిగిన తొక్కిసలాట ఘటన రాష్ట్రవ్యాప్తంగా చర్చనీయాంశంగా మారింది. దర్శనం కోసం భారీగా చేరుకున్న భక్తుల మధ్య నియంత్రణ కోల్పోవడంతో తొక్కిసలాట చోటుచేసుకుని పలువురు గాయపడగా, కొంతమంది భక్తులు ప్రాణాలు కోల్పోయిన ఘటన తీవ్ర విషాదాన్ని మిగిల్చింది.
అన్నవరం, సింహాచలం ఆలయాల్లో తొక్కిసలాట ఘటనలు
అన్నవరం శ్రీ సత్యనారాయణ స్వామి దేవస్థానం, విశాఖపట్నంలోని సింహాచలం వరాహ లక్ష్మీనరసింహ స్వామి ఆలయాల్లో కూడా భారీ రద్దీ సమయంలో తొక్కిసలాటలు జరిగి పలువురు భక్తులు గాయపడిన ఘటనలు నమోదయ్యాయి. భక్తుల నియంత్రణలో లోపాలు ఉన్నాయన్న విమర్శలు అప్పట్లో వినిపించాయి.
దుర్గగుడిలో కానుకల దొంగతనం
విజయవాడ కనకదుర్గమ్మ ఆలయంలో కూడా గతంలో హుండీ నగదు, విలువైన వస్తువుల మాయం ఘటన వెలుగులోకి రావడం కలకలం రేపింది. భక్తులు సమర్పించిన కానుకల భద్రతపై ప్రశ్నలు తలెత్తాయి.
శ్రీకాళహస్తి, ద్రాక్షారామంలో చోరీలు
శ్రీకాళహస్తి ఆలయంలో దేవాలయ ఆభరణాలు మాయం అయిన ఘటన, తూర్పు గోదావరి జిల్లా ద్రాక్షారామ భీమేశ్వరస్వామి ఆలయంలో హుండీ పగులగొట్టి నగదు దొంగిలించిన ఘటనలు కూడా వెలుగులోకి వచ్చాయి.
ఇప్పుడు భీమవరం పంచారామంలో నంది విగ్రహం ధ్వంసం
ఇలాంటి ఘటనల మధ్య ఇప్పుడు భీమవరం పంచారామ క్షేత్రంలో నంది విగ్రహం ధ్వంసం కావడం భక్తుల్లో మరింత ఆందోళన కలిగిస్తోంది. చారిత్రక ప్రాధాన్యం ఉన్న ఈ ఆలయంలో జరిగిన అపచారంపై స్థానికులు తీవ్ర ఆగ్రహం వ్యక్తం చేస్తున్నారు. బాధ్యులను గుర్తించి కఠిన చర్యలు తీసుకోవాలని డిమాండ్ చేస్తున్నారు.
ఈ వరుస ఘటనల నేపథ్యంలో రాష్ట్రంలోని ప్రముఖ దేవాలయాల్లో భద్రతను మరింత బలోపేతం చేయాల్సిన అవసరం ఉందని భక్తులు అభిప్రాయపడుతున్నారు. పోలీసులు ప్రస్తుతం భీమవరం ఘటనపై దర్యాప్తు కొనసాగిస్తున్నారు.
