తెలంగాణ అనే కలను నిజం చేసిన నాయకుడు, ఉద్యమానికి ప్రతీక, రాష్ట్ర అభివృద్ధికి మార్గదర్శి బీఆర్ఎస్ అధినేత కల్వకుంట్ల చంద్రశేఖర్ రావు (కేసీఆర్). దశాబ్దాల పాటు సాగిన తెలంగాణ ఆకాంక్షను ప్రజా ఉద్యమంగా మలచి, ప్రత్యేక రాష్ట్రాన్ని సాధించిన ఆయన రాజకీయ ప్రయాణం భారత రాజకీయాల్లో ప్రత్యేక అధ్యాయంగా నిలిచింది. నేడు ఆయన పుట్టిన రోజు సందర్భంగా తెలంగాణ కోసం చేసిన పోరాటం నుంచి ముఖ్యమంత్రిగా చేసిన సేవల వరకు ఆయన ప్రయాణం మరోసారి గుర్తుకు వస్తోంది.
తెలంగాణ రాష్ట్ర సాధన కోసం కేసీఆర్ చేసిన పోరాటం చరిత్రలో చిరస్థాయిగా నిలిచింది. 2001లో తెలంగాణ రాష్ట్ర సమితిని స్థాపించి, ప్రాంతీయ స్వాభిమానాన్ని ప్రజల్లో నింపారు. నిరాహార దీక్షలు, భారీ ర్యాలీలు, ప్రజా ఉద్యమాలతో కేంద్రాన్ని ఒత్తిడి చేసి 2014లో ప్రత్యేక తెలంగాణ సాధనకు కీలక శక్తిగా మారారు. ఆయన ఆత్మస్థైర్యం, వ్యూహాత్మక నాయకత్వం వల్లే తెలంగాణ రాష్ట్రం అవతరించిందని విశ్లేషకులు చెబుతారు.
ప్రత్యేక రాష్ట్రం ఏర్పడిన తర్వాత కేసీఆర్ తొలి ముఖ్యమంత్రిగా బాధ్యతలు స్వీకరించి అభివృద్ధికి పునాది వేశారు. రైతు సంక్షేమం కోసం రైతుబంధు, రైతు బీమా వంటి పథకాలు ప్రవేశపెట్టి దేశానికి ఆదర్శంగా నిలిచారు. మిషన్ భగీరథ, మిషన్ కాకతీయ వంటి కార్యక్రమాలతో గ్రామీణ ప్రాంతాల రూపురేఖలు మార్చారు. రెండు సార్లు ముఖ్యమంత్రిగా ఆయన పాలనలో తెలంగాణ అభివృద్ధి పథంలో వేగంగా ముందుకు సాగింది.
తెలంగాణలో కేసీఆర్ చెప్పుకునే గుర్తులు అనేకం. కాలేశ్వరం ప్రాజెక్ట్ ద్వారా సాగునీటి విస్తీర్ణం పెరగడం, హైదరాబాద్ను గ్లోబల్ నగరంగా అభివృద్ధి చేయడం, ఐటీ రంగానికి ప్రోత్సాహం ఇవ్వడం ఆయన పాలనలో జరిగిన కీలక మార్పులు. పల్లె ప్రగతి, పట్టణ ప్రగతి కార్యక్రమాలతో గ్రామాలు, పట్టణాల అభివృద్ధికి ప్రత్యేక దృష్టి సారించారు.
కేసీఆర్ అంటేనే గుర్తుకు వచ్చే అభివృద్ధి పనుల్లో సాగునీటి ప్రాజెక్టులు, సంక్షేమ పథకాలు, మౌలిక వసతుల విస్తరణ ప్రధానంగా నిలుస్తాయి. రైతు, మహిళ, వృద్ధులు, పేదల కోసం అమలు చేసిన పథకాలు ఆయన పాలనకు ప్రత్యేక గుర్తింపును తీసుకొచ్చాయి. తెలంగాణను ఆర్థికంగా బలమైన రాష్ట్రంగా నిలబెట్టే దిశగా ఆయన తీసుకున్న నిర్ణయాలు దీర్ఘకాల ప్రభావాన్ని చూపుతున్నాయి.
తెలంగాణ ఆవిర్భావం నుంచి అభివృద్ధి వరకు కేసీఆర్ ప్రయాణం రాష్ట్ర చరిత్రలో మైలురాయిగా నిలిచింది. ఉద్యమ నేతగా ప్రారంభమై రాష్ట్ర నిర్మాతగా, ముఖ్యమంత్రిగా మారిన ఆయన సేవలను తెలంగాణ ప్రజలు ఎప్పటికీ గుర్తుంచుకుంటారు. ఆయన పుట్టిన రోజు సందర్భంగా తెలంగాణ కోసం చేసిన పోరాటం, సాధించిన విజయాలు మరోసారి ప్రజల మదిలో ప్రతిధ్వనిస్తున్నాయి.
మాజీ ముఖ్యమంత్రి కేసీఆర్ గారికి ప్రజాగళం తరఫున పుట్టిన రోజు శుభాకాంక్షలు
