గ్యాస్ వినియోగదారులకు పెట్రోలియం కంపెనీలు ముఖ్యమైన ప్రకటన చేశాయి. గృహ వినియోగ ఎల్పీజీ కనెక్షన్ కలిగిన ప్రతి వినియోగదారు తప్పనిసరిగా ఈ-కేవైసీ ప్రక్రియను పూర్తి చేయాలని స్పష్టం చేశాయి. నిర్ణీత సమయంలో ఈ ప్రక్రియ పూర్తిచేయకపోతే సిలిండర్ బుకింగ్ సేవలను నిలిపివేయవచ్చని హెచ్చరించాయి. అర్హులైన లబ్ధిదారులకు మాత్రమే సబ్సిడీ అందేలా చేయడం, నకిలీ లేదా అక్రమ కనెక్షన్లను అరికట్టడం లక్ష్యంగా ఈ చర్యలు తీసుకున్నట్లు అధికారులు తెలిపారు.
వినియోగదారులు తమకు సమీపంలోని గ్యాస్ ఏజెన్సీలను సంప్రదించి బయోమెట్రిక్ ధృవీకరణ ద్వారా లేదా అధికారిక ఆన్లైన్ యాప్ల సహాయంతో ఈ-కేవైసీ ప్రక్రియను పూర్తి చేసుకోవచ్చని సూచించారు. ఈ ప్రక్రియను వీలైనంత త్వరగా పూర్తిచేయాలని కంపెనీలు కోరుతున్నాయి. ఇక గృహ వినియోగ గ్యాస్ సిలిండర్ల దుర్వినియోగాన్ని తగ్గించేందుకు బుకింగ్ నిబంధనల్లో కూడా మార్పులు చేశారు. ఒకసారి సిలిండర్ తీసుకున్న తర్వాత మరొక సిలిండర్ బుక్ చేసుకోవడానికి కనీసం 25 రోజుల వ్యవధి ఉండాలని కొత్త నియమం అమల్లోకి తెచ్చారు.
అంతర్జాతీయ పరిస్థితులు, గ్యాస్ నిల్వల పరిమితి కారణంగా కమర్షియల్ గ్యాస్ సరఫరాపై కూడా కొన్ని నియంత్రణలు అమలు చేస్తున్నట్లు సమాచారం. ప్రాధాన్యత క్రమంలో సరఫరా చేయాలని డీలర్లకు సూచనలు జారీ అయ్యాయి. ప్రస్తుతం ఆస్పత్రులు, విద్యాసంస్థల హాస్టళ్ల వంటి అత్యవసర సేవలకు మాత్రమే కమర్షియల్ గ్యాస్ సరఫరా చేయాలని కంపెనీలు స్పష్టం చేశాయి.
ఈ మార్పుల ప్రభావం హోటల్ పరిశ్రమపై పడే అవకాశం ఉందని వ్యాపార వర్గాలు చెబుతున్నాయి. మరోవైపు గృహ వినియోగదారులు తమ గ్యాస్ కనెక్షన్ నిలిపివేత సమస్యలు తలెత్తకుండా త్వరగా ఈ-కేవైసీ పూర్తి చేసుకోవాలని అధికారులు సూచిస్తున్నారు.
